تطور الطب إلى طب “خارق”
المعلوماتية الجينومية (Genomic Informatics)
خليني أقولها بطريقة ملفتة: المعلوماتية الجينومية جعلت الطب “خارقًا”. ما عاد العلاج ينطبق على الكل بنفس الطريقة. صار ممكن الآن تصميم علاجات تفهمك أنت كشخص، تفهم كيف جسمك يستجيب، وتصمم على مقاسك. وكأنها تصنع دواءً شخصيًا كأنه بدلة مفصلة خصيصًا للمريض.
اللهم كما علمتنا لغة الجينات، علّمنا كيف نسخر هذا العلم لما فيه الخير والصلاح. اللهم بارك لنا في علمنا، وامنحنا الحكمة في استخدامها. يا رب اجعل هذا العلم نورًا يهدي البشرية نحو مستقبل أفضل، وأزل به كل ألم ووجع.
من اقوى وأصعب مجالات المعلوماتية الصحية هو المعلوماتية الجينومية (Genomic Informatics) لأن التعامل فيها يكون مع بيانات ضخمة جدًا، تخيلو بيانات كل إنسان في الجينوم عنده حوالي 3 مليارات قاعدة جينية! عشان كذا يحتاجون أجهزة وبرامج متطورة جدًا، بالإضافة لفهم عميق للجينات وكيف تتفاعل مع بعضها.
وعاد مهمة مرة وهي اللي بتغير مستقبل الطب، وبتخلينا نعالج أمراض كانت مستحيلة في الماضي. ولو زاد تطور المجال ذا بتزيد قدرتنا على فهم الجسم وأمراضه بشكل أدق وأسرع.
اول فايدة منه والفائدة الأهم هي بدل م نعطي كل المرضى نفس العلاج، المعلوماتية الجينومية تسمح للأطباء يقدمون علاج يناسب كل شخص حسب جيناته. يعني كأن العلاج “مفصّل” عليه تفصييللل. يعني دقة على جودة و كفاءة ماشاءالله هذا الشيء يقلل من الآثار الجانبية ويزيد من فعالية العلاج بشكل كبير. مثلاً، إذا شخص عنده سرطان، يدرسون الجينات المرتبطة بالورم ويصممون خطة علاجية تناسب حالته بالضبط. بالله وش أحلى من كذا؟
ومن الفوايد برضو اكتشاف الأمراض الوراثية مبكراً يعني تخيلو لو تقدر تعرف إن عندك احتمال تصاب بمرض وراثي قبل حتى ما تظهر أعراضه؟ هذا اللي تقدمه المعلوماتية الجينومية. عن طريق تحليل جيناتك، يمكنهم اكتشاف الأمراض المحتملة مثل السكري أو أمراض القلب أو حتى السرطان الوراثي. الفائدة هنا إنك تقدر تاخذ احتياطاتك من بدري وتغير نمط حياتك أو تبدأ علاجات وقائية. وهذا الشيء مو بس ينقذ حياة ناس كثير، يخفف حتى الضغط على المستشفيات.
ومن الفوايد برضو اللي تكلمت عنها قبل فترة شركات الأدوية الحين تعتمد بشكل كبير على المعلوماتية الجينومية لتطوير أدوية جديدة. بدل ما يطورون دواء بالطريقة التقليدية اللي تاخذ سنوات، صاروا يدرسون الجينات المرتبطة بالمرض ويستهدفونها مباشرة. هذا يعني أن الأدوية تصير أكثر دقة وأقل تكلفة مع الوقت. مثلاً، إذا كان فيه مرض نادر، بدلاً من انتظار سنوات لتطوير علاج، المعلوماتية الجينومية تخليهم يعرفون الجينات المسؤولة ويصممون علاج يستهدفها بسرعة.
ليش هذي الفوائد مهمة؟
لأنها ببساطة قاعدة تغير شكل الطب اللي نعرفه. صار بإمكاننا فهم جسم الإنسان بطريقة ما كنا نتخيلها قبل. كل جين في جسمك يحكي قصة، والمعلوماتية الجينومية هي اللي تساعدنا نقرأ القصة هذه. وش رأيكم بالله؟ أحس فلة
نسأل الله الكريم، أن يبارك لنا في علمنا و يجعل هذا المجال وسيلة لخدمة البشرية ونفعها. واجعلنا ممن يسخرون العلم لرفع المعاناة وتحقيق الشفاء. آمين يا رب العالمين.
الكلام جبته من هنا:
الإسكندرية. (n.d.). الطب الشخصي: مفتاح أسرار الصحة الفردية https://www.bibalex.org/
The Aeon Clinic. (n.d.). فوائد الطب الجينومي ودوره في تطوير الرعاية الطبية. https://theaeonclinic.com/ar/
Amazon Web Services. (n.d.). What is genomic data? https://aws.amazon.com/ar/
